Rɛndinani zwɛ

Nte tɛnd'omyɛnɛ Note sur la transcription de l'omyɛnɛ

Manji, nkala mpolo y’inɔngɔ yi nche yi Manji (Ogooué Maritime), gho Gabon, yere aghom'araro mi ntɔzeni (150.000) m'anagha. Nche yi Manji y'Orungu (Itangani gh'alonga wa ghokighi yo nɛ île du Cap Lopez) yere nenge ni tove, n'agha. Gh'alonga Manji ya luwo osɛngɛ w'idɔwa n'ita, ghe re duwo nchagha. Ya luogo ni nyare, n'injɔghu, n'ingowa.

Manji nche y'Orungu. Orungu we re si Myɛnɛ. Ghere Ngwɛ Myɛnɛ e re anɔngɔ oroa : we re Ajumba, Enɛnga, Ghalwa, Mpongwɛ, Nkɔmi n'Orungu, n'inɔngw'imo. Ngwɛ Myɛnɛ wi re igomi nyi ntɔzeni ncho igomi nyi ntɔzeni ni ntɔzeni mbani m'anagha, ni minya nɛ we re 5% m'anagha mi Gabon (ndo wɔngani itanga mɛsɔnɔ n'ikɛngɛ).
Nchughu sino, anɔngɔ ma buni gho nche yi Manji, aranga kaw'Orungu dadyɛ.

Nkala mpolo y'inɔngɔ ghe dɛngo aniva ampolo : rere ni kiariseni.

Kiariseni yi duro bo gh'izamba yi nche yi Manji, i kanjuno kɛ gho Manji. Mbora yi dyezo n'owantanga wi kiariseni yere gh'Ighezɛ.

Rene y’okume ye kalunyo s'itimbe gho fatere yi pango intimbe gho Manji.

Ozamba were ghe gare-gare ni Manji ni nche yi Congo, yere ni liwa nyenge, n'imbora yi mpenjavenjo inyama : Wonga-Wongue, Iguela, Sette-Cama... Anwɛ ko kɛnda ghogho yɔmi nchughu gho pona nyama, rere n’agondjo s'imbora mɛsɔnɔ.