Rɛndinani zwɛ

Kiariseni :

Nche yi Gabon yi tola ni dɛnga ni koliza si kiariseni. Kiariseni yi pa 77% y'aniva mi Gabon. Imbora si dɛngo kiariseni sere gho Manji (gho mbeni, na gh'igha). Gh'ompuma 2004, Gabon a yonizi aghomi mi ntɔzeni otani (250 000) y'iregha ni kiariseni nchughu edu (gh'ompuma 1998, y'aluwogho 362 000 ). Ndo kiariseni yere kɔ ghe mana yo.

Mborekanjuno ye koko nɛ Sogara (Société Gabonaise de Raffinage), gh'Ighezɛ, pyere ni nkala yi Manji, ya vango gho mpuma wi 1967. Mborekanjuno yi pangino gho 25% ni nche yi Gabon, 16% ni kiti, ni 59% ni Total (Fala). Mborekanjuno yi kɛnda kawo gho 100% gho ngulu yɛ yodu.

Mɔngi wi koliza kiarseni ni Total, Mobil Oil, Pizo na Shell.

Rere :

Igha nyi Gabon, nye pughina 85% yi nche yi Gabon, nyere n'anɔngɔ amenge mi rere : vyagano ni nkama nai. Rere yi dɛngo yere : okume, ombɛga, ozigho, kevazingo, izombɛ, sipo...

Igha mɛnyɔnɔ nyere begho pa gh'inkowa sa tuntu (nwɛzɔma), poso rere y'okume. Rene y'ikɔgha y'okume yi kɛndizo n'Oghowɛ kwanga gho Manji. Ghogho yi datizo gho mbora ya tuntu, kwɛ yi ke janjo gho mbora yi sɛro yo.