Egolani zi nkombo - Ghendani gh'ighuge




Inɔngɔ nyi fala  
Version française  
 

>> Imya >> Anagha

Rogombe IquaquaJoseph Rogombe Iquaqua, owɔngisi wi ghɔlani

Gh’igomi ny’awana w’ayano n’Adèle Egoni ni Joseph Iquaqua, Joseph Rogombe Iquaqua agovi awan’along’awani. Ayani gh’Ogɔwɛ, gho Nkomi gh’ompuma wi 1908. Gh'ejuwa rerɛ, Joseph Rogombe n’awan’amori we per’awango. Obota vinyu gho pomiz’awan’anka. Gh’e twaniz’ayɛ Joseph Rogombe n’awan’amori awani gho Mpongwɛ gho sikulu. Ghe nɛnga y’impum’itani kwanga gha lɛngi yɛ sɛrtifika, diplomi mpolo y’egombe mɛzɔnɔ, 1925.

Manizape sikulu, ghe pakilya yɛ gho nɛnga ewilo zi bonge ghɔlani n’onome wa ghokogho nɛ Robaki, omo’nche olonga wa vakili n’ewilo mɛzɔnɔ. Ghere manɛ ewilo zi bonge ghɔlani z’ere tolizeghe yɛ, ayanjighi kɛ ghi fatere, na gho tɛndaghe yango. Ndo gh’ompuma wi 1962 gh’awɔngo yɛ gho Nago Mpolo y’Inchango, radio Gabon nunguno pa, no gha ro vakili yɛ n’ewilo zi bonge ghɔlani.

Nɔnɔ, gh’ayanji yɛ gho Nago Mpolo y’Inchango gho Mpongwɛ, gh’a veno y’inyanga gho nagho y’Inchango yi Manji na yi Mpongwɛ kwanga gh’a wɔngi yɛ retrɛti.

Anaga we re gho dyɔnginya nɛ apwe Robaki, Joseph Rogombe n’owɔngisi w’ighɔlani ompolo wi nche yazo yi Ghabon. Ntina mɛyɔnɔ a lekoro tango nyenge, a vityogho kɛ gho Fala gho tevize ghɔlani yɛ g’egombe z’igɔwi nyi Degoli. Joseph Rogombe ayuwi gho nagho yɛ gho Manji ompuma wi 1982.

Ghɔlani yinɔ ya wɔngo g’impuma yi 1930-40. Ntangw’anaga were to mio. Sambo ncho anw’a dingily’om’iwani, ncho ndegho, rɛndinani zwɛ gho pa zw’an’imawo. Akewani.

Velani kilitevo gho ghɔlani gho dyena yo mbyambye. Ezango 2 >>